బ్రెజిల్‌ అధ్యక్షుడితో ప్రధాని మోదీ కీలక భేటీ.. త్వరలో 20 బిలియన్ డాలర్ల వాణిజ్యం !

 భారత్, బ్రెజిల్ దేశాల మధ్య ఉన్న వ్యూహాత్మక భాగస్వామ్యం ఇరు దేశాల ప్రజలకు ఎంతో లాభదాయకంగా ఉందని ప్రధానమంత్రి నరేంద్ర మోదీ స్పష్టం చేశారు. న్యూఢిల్లీలోని హైదరాబాద్ హౌస్‌లో శనివారం బ్రెజిల్ అధ్యక్షుడు లూయిజ్ ఇనాసియో లులా డా సిల్వాతో ( Lula da Silva)  ఆయన ప్రతినిధుల స్థాయి చర్చలు జరిపారు. అనంతరం ఏర్పాటు చేసిన ఉమ్మడి విలేకరుల సమావేశంలో మోదీ మాట్లాడుతూ.. లాటిన్ అమెరికా ప్రాంతంలో భారత్‌కు బ్రెజిలే అత్యంత పెద్ద వాణిజ్య భాగస్వామి అని ఆయన గుర్తుచేశారు. రాబోయే రోజుల్లో ఇరు దేశాల మధ్య వాణిజ్యం 20 బిలియన్ డాలర్ల మార్కును సునాయాసంగా అధిగమిస్తుందన్న బలమైన విశ్వాసాన్ని ప్రధాని వ్యక్తం చేశారు. భారత్‌తో ద్వైపాక్షిక సంబంధాలను మరింత బలోపేతం చేయడానికి అధ్యక్షుడు లులా చూపుతున్న అంకితభావానికి ప్రత్యేక కృతజ్ఞతలు తెలిపారు. మన రెండు దేశాల మధ్య పెరుగుతున్న ఈ ఆర్థిక, వాణిజ్య సహకారం కేవలం మనకే కాకుండా గ్లోబల్ సౌత్ అనబడే యావత్ అభివృద్ధి చెందుతున్న దేశాల ప్రయోజనాలకు, పురోగతికి ఎంతగానో దోహదపడుతుందని మోదీ విశ్లేషించారు. అంతర్జాతీయ వేదికలపై ఇరు దేశాల గొంతుక మరింత బలంగా వినిపిస్తుందని ఆయన ఆకాంక్షించారు.